ആദായ നികുതി റിട്ടേൺ: തെറ്റായ വിവരങ്ങൾ നൽകിയാൽ കർശന നടപടി
ന്യൂഡൽഹി> ആദായ നികുതി റിട്ടേണിൽ തെറ്റായ വിവരങ്ങൾ സമർപ്പിച്ചാൽ കർശന നടപടിയുണ്ടാകുമെന്ന് വകുപ്പ്. ശമ്പളക്കാർക്കെതിരെയാണ് കടുത്ത നിയമനടപടികൾ സ്വീകരിക്കാൻ ആദായ നികുതി വകുപ്പ് ഒരുങ്ങുന്നത്. ജീവനക്കാർ മാത്രമല്ല തൊഴിലുടമയും നിയമനടപടിക്ക് വിധേയമാവേണ്ടി വരുമെന്നാണ് ആദായനികുതി വകുപ്പ് നൽകുന്ന മുന്നറിയിപ്പ്. നികുതിയിളവുകൾ നേടാനായി പലരും തെറ്റായ വിവരങ്ങൾ വകുപ്പിന് സമർപ്പിക്കാറുണ്ട്. ഇത്തരക്കാർക്കെതിരെ കർശന നടപടി സ്വീകരിക്കാനാണ് വകുപ്പിന്റെ നീക്കം. ഇവർക്ക് വ്യാജ റിട്ടേണുകൾ സമർപ്പിക്കാൻ സഹായം നൽകുന്നവരുൾപ്പടെ നിരീക്ഷണത്തിലാണെന്നാണ് ആദായ നികുതി വകുപ്പ് അറിയിച്ചിരിക്കുന്നത്. ആദായ നികുതി നിയമപ്രകാരം ഇത്തരത്തിലുള്ള വ്യാജ റിട്ടേണുകൾ സമർപ്പിക്കുന്നത് ശിക്ഷ ലഭിക്കാവുന്ന കുറ്റമാണെന്നും ആദായ നികുതി വകുപ്പ് വ്യക്തമാക്കുന്നു. ജീവനക്കാർക്ക് വ്യാജ ആദായ നികുതി റിട്ടേണുകൾ നൽകാൻ സഹായിക്കുന്ന സംഘം ബംഗളൂരുവിൽ അറസ്റ്റിലായിരുന്നു. Read on deshabhimani.com