"പതിനെട്ടാം പടി'യുമായി മമ്മൂട്ടി; ആദ്യ ലിറിക്കൽ വീഡിയോ പുറത്തിറങ്ങി
കൊച്ചി> ഓഗസ്റ്റ് സിനിമാസിന്റെ ബാനറിൽ മമ്മൂട്ടിയെ നായകനാക്കി ശങ്കർ രാമകൃഷ്ണൻ തിരക്കഥ എഴുതി സംവിധാനം ചെയ്യുന്ന ചിത്രമാണ് പതിനെട്ടാം പടി. സിനിമയുടെ ആദ്യ ലിറിക്കൽ വീഡിയോ പുറത്തിറങ്ങി. മമ്മൂട്ടിയുടെ ഫേസ്ബുക്ക് പേജിലൂടെയാണ് ഗാനം പുറത്തുവിട്ടത്. മമ്മൂട്ടിയെക്കൂടാതെ, പ്രത്വിരാജ്, ആര്യ, ഉണ്ണിമുകുന്ദൻ, മനോജ് കെ ജയൻ, ലാലു അലക്സ്, മണിയൻ പിള്ള രാജു, സുരാജ് വെഞ്ഞാറമ്മൂട്, പ്രിയാ മണി, സാനിയ ഇയ്യപ്പൻ, മുത്തു മണി തുടങ്ങി 65 പുതുമുഖങ്ങൾ ഉൾപ്പെടെ വലിയ ഒരു താരനിരയെ ആണ് ഷാജി നടേശൻ എന്ന നിർമാതാവ് പതിനെട്ടാം പടിയിലൂടെ അവതരിപ്പിക്കുന്നത്. ആഗസ്റ്റ് സിനിമയുടെ പതിനൊന്നാമത്തെ നിർമ്മാണ ചിത്രമാണ്. എ എച് കാഷിഫ് എന്ന പുതിയ സംഗീത സംവിധായകനെയാണ് ശങ്കർ രാമകൃഷ്ണൻ ചിത്രത്തിലൂടെ അവതരിപ്പിക്കുന്നത്. എ ആർ റഹ്മാന്റെ പാരമ്പര്യത്തിൽ നിന്ന് ആണ് കാഷിഫ് വരുന്നത്. ചരിത്രം രചിക്കുന്ന എ എം സ്റ്റുഡിയോസിൽ നിന്ന് മലയാളത്തിലേക്ക് വീണ്ടുമൊരുകൂട്ടം പാട്ടുകളും എത്തുന്നത്. ഷഹബാസ് അമൻ, നകുൽ, ഹരി ചരൺ, എന്നിവരാണ് പാട്ട് പാടിയിരിക്കുന്നത്. ജൂലൈ 5 ന് ആണ് പതിനെട്ടാം പടി റിലീസ് ചെയ്യുന്നത്. Read on deshabhimani.com